Ur gevredigezh eo Radio Kerne. Ma faot deoc'h sikour ac'hanomp, kit e darempred gant ar gevredigezh Migoned Radio Kerne. Ma faot deoc'h kemer perzh da vat 'ba buhez ar radio, skrivit da:
5 implijad a labour leun-amzer evit Radio Kerne ha 1 evit ar rouedad radioioù "Brudañ ha Skignañ". Grit anaoudegezh gante !
Lou Millour
Ur bannig avel foll e-barzh an ti, gant ar bidoc'hig-se, deuet eus n'ouzer ket peseurt planedenn: Lou… ur vouezhig raouliet un disterañ, da gas ac'hanomp eus dek eur hanter da greisteiz. Fent, lusk ha startijenn ‘vez ganti teir gwezh ar sizhun evit an abadenn 'Vimp ket gwerzhet. Goût a ra ivez reiñ deomp da glevet, an tadoù kozh faro, ar mammoù ekolo, ar vugale dirollo, ha sonerezh elektro.
Jongliñ gant an implijoù amzer, ar bruderezh, ar c’henlabourerien, an abadennoù a youl vat, ar skoazellerien, ur c’hoari aes evit hor renerez!
Laëtitia Fitamant
Klevet a rit mouezh flour Laëtitia dibaoe pell bremañ. Goût a ra deus pep tra, animañ, mont war an dachenn, fardañ kronikoù dibar, kinnig ar c’heleier... Arbennig eo gant Internet, furchal a ra a-gleiz hag a-zehoù a benn diskoachañ keleier diroll ar bed o treiñ. Tro ‘po da glevout anezhi div wezh ar sizhun o luskañ an abadenn 'Vimp ket gwerzhet. Pe dizoloiñ a bep seurt dre hec’h abadennoù An diskouarn o nijal a blij atav d’ar publik. Ha neuze, petra a vez lâret? Trugarez!
Katell Uguen
Katell Uguen a zo perzh eus skipailh kazetennerien Brudañ ha Skignañ a ginnig deoc'h bemdez keleier fresk gant sonioù eus Breizh a-bezh. Brezhoneg brav ar plac'h a glevit neuze abred mintin e pad an abadenn Tarzh an Deiz ha da 5e30 e pad Trouz er Gêr. Ma 'peus titouroù diwar benn an aktu a fell deoc'h embann, kit e darempred gant Katell! Soniñ guitar a ra ar plac'h, sellit mat war leurennoù ar vro, posubl vo deoc'h lakaat un dremm war ar vouez...
Morgane Bramoullé
Morgane emaoc'h o vont da welet war hentoù bro Gerne oc'h atersiñ ar re yaouank hag ar re gozh... Abadennoù An diskouarn o nijal a ginnigo deomp bep dibenn sizhun. Plac'h al lennegezh, e raio deomp dizoloiñ a bep seurt skrivagnerien ha skrivagnerezed eus ar bed a-bezh e barzh he c'hronikoù. Ken prim e labour ar plac'h vo chañsoù da glevet anezhi ivez e barzh an abadenn mintin Tarzh an Deiz gant Brieg hag asambles gant Lou evit Deomp dezhi abadenn ar vugale. Emañ o tont eus bro Leon, oc'h adstummañ anezhi mod Kerne emaomp met chut... arabat lâret dezhi!
Gael Hélary
Ne vez ket klevet war ar gwagennoù… Labourat a ra kuzh ha didrouz med a-drugarez dezhañ 'vez sonerezh dispar hag a bep seurt: kelc'hgeriadur ar radio an hini eo, souezhet bras 'vezomp bemdez gantañ… Lâret a raio deoc'h n'eo ket aes plijout d'an holl gant ar sonerezh ho peus dibabet . Hemañ a garfe a-walc'h chom eurvezhioù-pad o tibab sonerezh, trankil en e gorn mes atav 'vez galvet ar paourkaezh evit a bep seurt abegoù:
- Gael, an teknik a ya a-dreuz !
- Gael, sac'het eo ma urzhiataer!
- Gael, n'ouzon ket ober…
Setu hep hon teknikour muiañ karet, Radio Kerne ebet!
Brieg Moal
Un Tregeriad e Bro-Gerne! Brieg Moal ec'h anv deuet war eeun eus Kawan. Emgavet eo e traoñ Kerne evit hon brasañ plijadur hag hoc'h hini. Kas endro an abadennoù An diskouarn o nijal a raio d'e dro, mont da reportajiñ war an dachenn ivez, kemer perzh en abadenn Deomp dezhi evit ar vugale... ha degas e zibaboù sonerezh a raio ouzhpenn sur a-walc'h, soner binviji stekinn evel m'emann ar paotr.